2027ના વનડે વર્લ્ડ કપમાં ભારત-પાકિસ્તાનની મેચ માટે ટિકિટની રેકોર્ડ માંગ

2027માં યોજાનારા ICC મેન્સ ક્રિકેટ વર્લ્ડ કપ પહેલાં જ ભારત અને પાકિસ્તાન વચ્ચેની મેચને લઈને ભારે ઉત્સાહ જોવા મળી રહ્યો છે. આંતરરાષ્ટ્રીય ક્રિકેટ કાઉન્સિલ (ICC)ના જણાવ્યા અનુસાર, જોહાનિસબર્ગમાં યોજાનારી ભારત-પાકિસ્તાનની ગ્રુપ સ્ટેજ મેચ માટે અત્યાર સુધીમાં લગભગ 84 લાખ ટિકિટ અરજીઓ મળી છે. ખાસ વાત એ છે કે આ મેચ જે વાન્ડરર્સ સ્ટેડિયમમાં રમાશે તેની ક્ષમતા માત્ર 34 હજાર દર્શકોની છે.

10 ઓક્ટોબર 2027ના રોજ રમાશે મેચ

ભારત અને પાકિસ્તાન વચ્ચેની આ મેચ 10 ઓક્ટોબર 2027ના રોજ દક્ષિણ આફ્રિકાના જોહાનિસબર્ગ સ્થિત વાન્ડરર્સ સ્ટેડિયમમાં રમાશે. ICCના આંકડા મુજબ, મેચ માટે કુલ 83,97,294 ટિકિટ અરજીઓ મળી છે. સ્ટેડિયમની ક્ષમતાની સરખામણીએ આ માંગ ઘણી વધારે છે.

વર્લ્ડ કપની ફાઇનલ માટે પણ ભારે માંગ

આ જ સ્ટેડિયમમાં 21 નવેમ્બર 2027ના રોજ વર્લ્ડ કપની ફાઇનલ રમાવાની છે. ફાઇનલ મેચ માટે પણ લગભગ 79 લાખ ટિકિટ અરજીઓ મળી છે. ભારત-પાકિસ્તાનની મેચ હાલમાં ટિકિટની માંગના મામલે ફાઇનલ કરતાં આગળ છે.

193 દેશોના ચાહકોએ નોંધાવી રસ

ICCના જણાવ્યા અનુસાર, 1 નવેમ્બર સુધીમાં સમગ્ર ટૂર્નામેન્ટ માટે 193 દેશોના લગભગ 28 લાખ ચાહકોએ ટિકિટ મેળવવા માટે નોંધણી કરાવી હતી. કુલ ટિકિટ અરજીઓનો આંકડો 12 કરોડને પાર કરી ગયો છે. આ દર્શાવે છે કે વર્લ્ડ કપને લઈને દુનિયાભરના ક્રિકેટ ચાહકોમાં ભારે ઉત્સાહ છે.

દક્ષિણ આફ્રિકા, ઝિમ્બાબ્વે અને નામિબિયા કરશે આયોજન

2027નો મેન્સ વનડે વર્લ્ડ કપ દક્ષિણ આફ્રિકા, ઝિમ્બાબ્વે અને નામિબિયા સંયુક્ત રીતે યોજશે. ટૂર્નામેન્ટમાં 14 ટીમો વચ્ચે કુલ 57 મેચ રમાશે. આ સાથે 24 વર્ષ બાદ મેન્સ વનડે વર્લ્ડ કપ ફરી આફ્રિકામાં યોજાવા જઈ રહ્યો છે.

ટિકિટ માટેની બેલેટ પ્રક્રિયા 21 નવેમ્બર 2026 સુધી ખુલ્લી રહેશે. આ પ્રક્રિયામાં ટિકિટ માટે અરજી કરવી મફત છે અને જો કોઈ મેચ માટે માંગ ઉપલબ્ધ ટિકિટ કરતાં વધારે હશે, તો લકી ડ્રો જેવી રેન્ડમ પસંદગી દ્વારા ટિકિટ ખરીદવાની તક આપવામાં આવશે.