ભારતના સ્ટાર જેવેલિન થ્રોઅર અને બે વખતના ઓલિમ્પિક મેડલ વિજેતા નીરજ ચોપરા માટે મોટો ઝટકો સામે આવ્યો છે. એન્કલમાં લિગામેન્ટ ફાટવાને કારણે નીરજ ચોપરાએ 2026ની બાકીની સમગ્ર એથ્લેટિક્સ સીઝનમાંથી બહાર થવાનો નિર્ણય લીધો છે. આ ઈન્જરીને કારણે તે આગામી એશિયન ગેમ્સમાં પણ ભાગ લઈ શકશે નહીં.

નીરજ ચોપરાએ સોશિયલ મીડિયા પર પોતાના ઈન્જરી અંગે માહિતી આપી હતી. તેમણે જણાવ્યું કે લોઝાન ડાયમંડ લીગમાં 88.05 મીટરનો સીઝન બેસ્ટ થ્રો કર્યા બાદ તેઓ પોતાની લય પાછી મેળવી રહ્યા હોવાનું અનુભવતા હતા. પરંતુ તેના થોડા સમય બાદ ટ્રેનિંગ દરમિયાન તેમના એન્કલમાં લિગામેન્ટ ટિયર થઈ ગયું. ડોક્ટર અને પોતાની ટીમ સાથે ચર્ચા કર્યા બાદ તેમણે બાકીની સીઝનમાંથી દૂર રહેવાનો નિર્ણય લીધો.

આ ઈન્જરીના કારણે નીરજ હવે જાપાનમાં યોજાનારી 2026 એશિયન ગેમ્સમાં પોતાના ખિતાબનો બચાવ કરી શકશે નહીં. આ ઉપરાંત તેઓ બ્રસેલ્સમાં યોજાનારી ડાયમંડ લીગ ફાઇનલ અને વર્લ્ડ એથ્લેટિક્સ અલ્ટિમેટ ચેમ્પિયનશિપમાં પણ ભાગ નહીં લઈ શકે.

નીરજ ચોપરાએ ઈન્જરી પહેલાં લોઝાન ડાયમંડ લીગમાં 88.05 મીટરનો થ્રો કરીને સિલ્વર મેડલ જીત્યો હતો. આ તેમનો 2026 સીઝનનો શ્રેષ્ઠ થ્રો હતો અને આ પ્રદર્શન બાદ તેમની ફોર્મમાં સુધારો જોવા મળી રહ્યો હતો. જોકે ઈન્જરીના કારણે હવે તેમની સીઝન સમય પહેલાં જ સમાપ્ત થઈ ગઈ છે.

નીરજ માટે આ એક વર્ષમાં બીજો મોટો ઈન્જરી ઝટકો છે. અગાઉ તેઓ પીઠની ઈન્જરીને કારણે લાંબા સમય સુધી સ્પર્ધાથી દૂર રહ્યા હતા. 2026માં વાપસી કર્યા બાદ તેઓ ધીમે ધીમે પોતાની ફિટનેસ અને ફોર્મ પરત મેળવી રહ્યા હતા.

એશિયન ગેમ્સમાં નીરજની ગેરહાજરી ભારત માટે પણ મોટો ઝટકો છે. તેઓ ભારતના સૌથી મોટા ગોલ્ડ મેડલ દાવેદારોમાંથી એક હતા. ટોક્યો ઓલિમ્પિકમાં ગોલ્ડ અને પેરિસ ઓલિમ્પિકમાં સિલ્વર મેડલ જીતનાર નીરજ ભારતીય એથ્લેટિક્સનો સૌથી મોટો ચહેરો બની ચૂક્યા છે.

જોકે નીરજ ચોપરાએ ઈન્જરીને લઈને નિરાશા વ્યક્ત કરી છે પરંતુ તેમણે રિહેબિલિટેશન પર ધ્યાન આપીને મજબૂત વાપસી કરવાનો સંકલ્પ પણ વ્યક્ત કર્યો છે. હવે તેમનું મુખ્ય લક્ષ્ય સંપૂર્ણ રીતે સ્વસ્થ થવાનું અને આગામી સીઝન માટે તૈયાર થવાનું રહેશે.