દિલ્હી NCRમાં CNG વાહન ચલાવતા લોકો માટે મોટો ઝટકો લાગ્યો છે. ઇન્દ્રપ્રસ્થ ગેસ લિમિટેડ એટલે કે IGLએ CNGના ભાવમાં પ્રતિ કિલો 3.89 રૂપિયાનો વધારો કર્યો છે. નવા ભાવ 29 ઓગસ્ટ 2026ના રોજ સવારે 6 વાગ્યાથી લાગુ થઈ ગયા છે. આ વધારા બાદ દિલ્હીમાં CNGનો ભાવ 83.09 રૂપિયાથી વધીને 86.98 રૂપિયા પ્રતિ કિલો થઈ ગયો છે.

દિલ્હી ઉપરાંત NCRના અન્ય શહેરોમાં પણ CNGના ભાવમાં વધારો કરવામાં આવ્યો છે. નોઈડા અને ગાઝિયાબાદમાં હવે CNG 95.59 રૂપિયા પ્રતિ કિલો મળશે. ગુરુગ્રામમાં નવો ભાવ 92.01 રૂપિયા પ્રતિ કિલો થયો છે. જ્યારે મેરઠ અને શામલીમાં CNGનો ભાવ 95.47 રૂપિયા પ્રતિ કિલો થઈ ગયો છે. રેવાડીમાં નવો ભાવ 91.59 રૂપિયા પ્રતિ કિલો રહેશે.

IGLએ ભાવ વધારાનું મુખ્ય કારણ આંતરરાષ્ટ્રીય LNG એટલે કે Liquefied Natural Gasના વધેલા ભાવને ગણાવ્યું છે. કંપનીના જણાવ્યા અનુસાર CNG માટે જરૂરી ગેસનો મોટો હિસ્સો આયાત કરવામાં આવતા LNGમાંથી મળે છે. પશ્ચિમ એશિયાની પરિસ્થિતિ અને સંઘર્ષ બાદ આંતરરાષ્ટ્રીય બજારમાં LNGના ભાવમાં નોંધપાત્ર વધારો થયો છે. જેના કારણે કંપનીના ઇનપુટ ખર્ચમાં વધારો થયો છે.

IGLએ જણાવ્યું છે કે આંતરરાષ્ટ્રીય LNGના ભાવ ઊંચા રહેતા CNGના ઇનપુટ ગેસ ખર્ચ પર સતત દબાણ વધી રહ્યું હતું. આ વધેલા ખર્ચને આંશિક રીતે સરભર કરવા માટે પ્રતિ કિલો 3.89 રૂપિયાનો ભાવ વધારો જરૂરી બન્યો હતો.

આ વર્ષ દરમિયાન દિલ્હીમાં CNGના ભાવમાં આ પાંચમો વધારો છે. અગાઉ પણ માત્ર 10 દિવસના સમયગાળામાં IGLએ ચાર તબક્કામાં CNGના ભાવ વધાર્યા હતા. આ ચાર વધારામાં કુલ 6 રૂપિયા પ્રતિ કિલોનો વધારો થયો હતો. હવે તાજા 3.89 રૂપિયાના વધારા બાદ CNG વાહનચાલકો પર વધુ ખર્ચનો બોજ પડશે.

CNGના ભાવ વધારાની સીધી અસર ખાનગી વાહનો ઉપરાંત ઓટો રિક્ષા ટેક્સી અને અન્ય કોમર્શિયલ વાહનોના સંચાલન ખર્ચ પર પડી શકે છે. રોજિંદા CNG પર નિર્ભર ડ્રાઇવરો માટે ઇંધણ ખર્ચ વધવાથી તેમના નફા અને દૈનિક બજેટ પર પણ અસર થવાની શક્યતા છે.

નવા ભાવ લાગુ થયા બાદ દિલ્હી NCRના CNG ગ્રાહકોને હવે પ્રતિ કિલો વધુ ચૂકવણી કરવી પડશે. આંતરરાષ્ટ્રીય ગેસ બજારમાં ભાવની સ્થિતિ અને આયાત ખર્ચ આગામી સમયમાં CNGના ભાવ પર વધુ અસર કરી શકે છે.